სიახლეები
09.09.2021
ჯიღაურას სამეცნიერო-კვლევით ბაზას აჭარის ა/რ სოფლის მეურნეობის მინისტრი ესტუმრა
![](/modules/news/images/0/rsz_img_5686.png)
„აჭარის სოფლის მეურნეობის სამინისტროს აქვს სტაჟირების პროგრამა, რომლის ფარგლებშიც სტუდენტებს ეძლევათ შესაძლებლობა ანაზღაურებადი სტაჟირება გაიარონ. დღეს, ჩვენი სტაჟიორები ჯიღაურას ბაზაზე მიმდინარე პროექტებს, ვაზის და ხეხილის უნიკალურ, ენდემურ ჯიშებს გაეცნენ. სამეცნიერო-კვლევით ბაზაზე ყველანაირი პირობაა იმისთვის, რომ ახალი კადრების გადამზადება მოხდეს, ახალგაზრდებმა ცოდნა გაიღრმაონ და დარგში არსებულ სიახლეებს გაეცნონ“, - აღნიშნა აჭარის ა/რ სოფლის მეურნეობის მინისტრმა, გიორგი სურმანიძემ.
აგროტურის ფარგლებში, მომავალი აგრონომები წილკნის ერთწლოვანი კულტურების საცდელ ბაზასაც ესტუმრნენ, ნიადაგის კვლევის ლაბორატორიის მუშაობას და მიმდინარე კვლევებს გაეცნენ. ლაბორატორიაში საქართველოს ნიადაგების საერთო მდგომარეობის შესწავლა-ინვენტარიზაცია მიმდინარეობს.
„სოფლის მეურნეობის სამეცნიერო-კვლევითი ცენტრი, სამეცნიერო-კვლევითი სამუშაოების პარალელურად, აქტიურად არის ჩართული სწავლება-გადამზადების პროექტებში. ცენტრში მუდმივად მიმდინარეობს ახალგაზრდების, სტუდენტების, ფერმერების ტრენინგები, სწავლება და ცოდნის გაღრმავება. სექტორში მეტი მცოდნე და პროფესიონალი კადრის არსებობა, ხელს შეუწყობს ქვეყანაში სოფლის მეურნეობის განვითარებას“, - განაცხადა სოფლის მეურნეობის სამეცნიერო-კვლევითი ცენტრის დირექტორმა, ლევან უჯმაჯურიძემ.
ჯიღაურას მრავალწლოვანი კულტურების საცდელ-სადემონსტრაციო ბაზაზე არსებულ საკოლექციო ნარგაობაში დაცულია ვაზის ქართული 470-მდე და 350 უცხოური ჯიში, ველური ვაზის 120-ზე მეტი ფორმა, თესლოვანი, კურკოვანი, კაკლოვანი და კენკროვანი კულტურების 42 ადგილობრივი და 270-ზე მეტი ინტროდუქცირებული ჯიში. ახალგაზრდა კადრების დაინტერესების, მოზიდვის, მომზადებისა და აგრარულ სფეროში მათი ჩართვის მიზნით, ცენტრის ბაზებზე რეგულარულად მიმდინარეობს სპეციალისტებთან შეხვედრები და ტრენინგები.