სიახლეები

საცდელ-სადემონსტრაციო ნაკვეთის პრეზენტაცია

სსიპ საქართველოს სოფლის მეურნეობის სამეცნიერო-კვლევითი ცენტრის ერთწლოვანი კულტურების კვლევის დეპარტამენტისა და სოფლის მეურნეობის სამინისტროს კახეთის რეგიონალური სამმართველოს ორგანიზებით, თელავის მუნიციპალიტეტის სოფ.გულგულის ადმინისტრაციულ ერთეულში არსებული სადემონსტრაციო ნაკვეთის  პრეზენტაცია გაიმართა. პრეზენტაციას ესწრებოდნენ ადგილობრივი ფერმერები, კახეთის რეგიონში არსებული სოფლის მეურნეობის სამინისტროს საინფორმაციო-საკონსულტაციო სამსახურების თანამშრომლები და ადგილობრივი თვითმმართველობის წარმომადგენლები, ასევე USAID-ის   მიერ დაფინანსებული პროექტის „ექსტენციისა და საკონსულტაციო მომსახურების გაძლიერება საქართველოში“ (SEAS) ხელმძღვანელი პირები.
სტუმრებს სამეცნიერო-კვლევითი ცენტრის სპეციალისტებმა, საცდელ-სადემონსტრაციო ნაკვეთზე მიმდინარე საშემოდგომო თავთავიანების, ბოსტნეულ - ბაღჩეულის, კარტოფილის, მზესუმზირის, ტექნიკური პარკოსანი კულტურების ადგილობრივი და ინტროდუცირებული ჯიშების შესახებ  კვლევები გააცნეს ასევე ამომწურავად გასცეს პასუხები დასმულ შეკითხვებს. განსაკუთრებული დაინტერესება გამოიწვია სიმინდის, მზესუმზირისა და ხორბლის ჯიშებმა, ასევე კახეთის რეგიონში ნაკლებად გავრცელებულმა კულტურებმა, როგორიცაა სელი, ალისარჩული, სოია და ოსპი.
მეცნიერთა შეფასებით საცდელ ნაკვეთებზე, წარმატებით მიმდინარეობს, როგორც ქართული, ასევე ინტროდუცირებული ჯიშების სელექციური გამოცდა. ცდების შედეგად გამოიკვეთა კახეთის რეგიონისთვის სხვადასხვა კულტურების კარგად ადაპტირებული ჯიშები, რომლებიც საკმაოდ მაღალი პროდუქტიულობით ხასიათდება. საცდელი ნიმუშების მოსავლის აღების შემდეგ მოხდება  მათი ხარისხობრივი და სტრუქტურული მაჩვენებლების შესწავლა.