სიახლეები

ნიადაგმცოდნეთა მსოფლიო კონგრესში სამეცნიერო-კვლევითი ცენტრის სპეციალისტმა მონაწილეობა მიიღო

ბრაზილიაში ნიადაგმცოდნეთა მსოფლიო კონგრესი გაიმართა, რომელშიც მონაწილეობა სოფლის მეურნეობის სამეცნიერო-კვლევითი ცენტრის პროფესორ ივანე სარიშვილის სახელობის ნიადაგის კვლევის ლაბორატორიის უფროსმა გიორგი ღამბაშიძემ მიიღო. ნიადაგის ლაბორატორია კონგრესზე 2 მოხსენებით - სიღნაღის მუნიციპალიტეტში არსებული დამლაშებული ნიადაგის კვლევის შედეგები და მცხეთისა და კასპის მუნიციპალიტეტების ტერიტორიაზე არსებული სასოფლო-სამეურნეო სავარგულების ნიადაგებში საკვები ელემენტების მარაგები, წარსდგა.

ნიადაგმცოდნეთა მსოფლიო კონგრესი 4 წელიწადში ერთხელ იმართება და მასში მონაწილეობა მნივშენლოვანია სოფლის მეურნეობის სამეცნიერო-კვლევითი საქმიანობის წარმოსაჩენად და ახალი სამეცნიერო კავშირების დასამყარებლად.

კონგრესის პარალერულად, შეხვედრები გაიმართა ბრაზილიის სოფლის მეურნეობის, მეცხოველეობის და სურსათის სამინისტროს სასოფლო-სამეურნეო კვლევის კორპორაციის (Embrapa) წარმომადგენლებთან, რომელიც ბრაზილიაში უმსხვილეს სამეცნიერო-კვლევით ცენტრს წარმოადგენს. შეხვედრაზე მხარეებმა ნიადაგის ეროვნული ინვენტარიზაციის პროგრამა განიხილეს. Embrapa-ს წარმომადგენლებმა შეხვედრის მონაწილეებს ამერიკელ და ევროპელ პარტნიორ ორგანიზაციებთან თანამშრომლობის ფორმები გააცნეს, რაც უზრუნველყოფს უახლეს სამეცნიერო მიღწევებზე ხელმისაწვოდმობას და ერთობლივი კვლევების განხორციელებას.

ნიადაგმცოდნეთა მსოფლიო კონგრესი რიო-დე-ჟანეიროში ნიადაგმცოდნეთა საერთაშორისო საზოგადოების (IUSS), და ბრაზილიის და ლათინო-ამერიკის ნიადაგმცოდნეთა საზოგადოებების ორგანიზებით ჩატარდა.