სიახლეები

მეცხოველეობაში სანაშენე საქმიანობა შესაძლოა კანონით დარეგულირდეს

სოფლის მეურნეობის სამეცნიერო-კვლევით ცენტრში მეცხოველეობის, ვეტერინარიის და საკვებწარმოების კვლევის დეპარტამენტის მიერ შემუშავებული კანონპროექტის „სანაშენე მეცხოველეობის შესახებ“ განხილვა დარგის სპეციალისტებთან ერთად გაიმართა. კანონპროექტის მიზანია სასოფლო-სამეურნეო ცხოველებისა და ფრინველების აბორიგენული და ენდემური ჯიშებისა და პოპულაციების, აგრეთვე, ინტროდუცირებული ჯიშების დაცვისა და გაუმჯობესების სფეროში სახელმწიფო რეგულირების ერთიანი პრინციპების განსაზღვრა, ბაზარზე მაღალი ხარისხის სანაშენე პირუტყვისა და მასალის მიწოდების უზრუნველსაყოფად. კანონპროექტი, როგორც დროებითი ღონისძიება, განსაზღვრავს მეცხოველეობაში სანაშენე საქმიანობის სამართლებრივ-ეკონომიკურ საკითხებს, მის ორგანიზაციულ ფორმებს და მიმართულია სასოფლო-სამეურნეო ცხოველთა სანაშენე და პროდუქტიული თვისებების გაუმჯობესებისაკენ.

კანონპროექტი ითვალისწინებს მონაცემთა ბანკის, გენეტიკური და ზოოტექნიკური კვლევის ლაბორატორიების ჩამოყალიბებას, ასევე, სანაშენე საქმის სამსახურის შექმნას, რომელიც ქვეყნის მთელ ტერიტორიაზე სანაშენე მუშაობის სამეცნიერო-ტექნიკურ ერთიან პოლიტიკას გაატარებს; განსაზღვრავს სანაშენე მუშაობის ორგანიზაციების სახეებს (სტრუქტურულ ერთეულებს) და მათ რეგლამენტს; სანაშენე ცხოველებზე დაადგენს სტანდარტებს/ტექნიკურ პირობებს, მათი შეფასების ნორმებსა და წესებს, აგრეთვე ზოოტექნიკური და სანაშენე აღრიცხვის ფორმებს; ცხოველთა სახეობებისა და ჯიშების მიხედვით, დაამტკიცებს სანაშენე მუშაობის საერთო ეროვნულ და რეგიონალურ პროგრამებს; მიიღებს გადაწყვეტილებას გაქრობის პირას მყოფი ენდემური და აბორიგენული ჯიშების დაცვა-აღდგენის და გაუმჯობესების, აგრეთვე, გლობალური მნიშვნელობის ჯიშებთან სანაშენე-სასელექციო მუშაობის საერთაშორისო პროგრამებში მონაწილეობაზე; მონაცემთა ცენტრალურ ბაზაში დაარეგისტრირებს სანაშენე მეურნეობებს, სანაშენე პროდუქციასა და/ან მასალას; გენეტიკური და ზოოტექნიკური ლაბორატორიების მეშვეობით უზრუნველყოფს სანაშენე პროდუქციის და/ან მასალის ექსპერტიზას; კოორდინირებას გაუწევს საერთაშორისო თანამშრომლობას სანაშენე მეცხოველეობის სფეროში და სხვა.

სანაშენე მეცხოველეობის საწარმოს აღიარებაზე გაიცემა შესაბამისობის სერტიფიკატი და სარეგისტრაციო მოწმობა. აპრობაცია, რეგისტრირება და სერტიფიცირება მოხდება სანაშენე პროდუქციის/მასალის წარმოშობის, ჯიშობრიობის, პროდუქტიულობის და გენეტიკური მანკების არარსებობის დადასტურების მიზნით.

კანონპროექტის განხილვას სოფლის მეურნეობის სამეცნიერო-კვლევითი ცენტრის დირექტორი ლევან უჯმაჯურიძე, საქართველოს მერძევეობის ასოციაციის, კომპანიის „კავკასიის გენეტიკა“, აჭარის სოფლის მეურნეობის სამინისტროს ა(ა)იპ აგროსერვის ცენტრის წარმომადგენლები და ფერმერები ესწრებოდნენ.