facebook
youtube
mail

სიახლეები

26.08.2015

ტრენინგები თხილის მოვლა-მოყვანის ტექნოლოგიების შესახებ

2015 წელს საქართველოს მთავრობის ინიციატივით თხილის სექტორის განვითარების პროგრამა დაიწყო. პროგრამას სოფლის მეურნეობის სამინისტრო ახორციელებს. მიმდინარე წლის აგვისტოს თვეში, სახელმწიფო პროგრამის „თხილის წარმოების განვითარება სასოფლო-სამეურნეო კოოპერაციის მხარდაჭერის გზით“ ფარგლებში, სოფლის მეურნეობის სამეცნიერო-კვლევითი ცენტრის მრავალწლოვანი კულტურების კვლევისა და სარგავი მასალების წარმოების დეპარტამენტის სპეციალისტების მიერ სამეგრელო-ზემო სვანეთის რეგიონში ჩატარდა ტრენინგები, რომელიც მიზნად ისახავდა თხილის მწარმოებელი ადგილობრივი ფერმერებისთვის და ამ დარგით დაინტერესებული პირებისთვის ცოდნის გაღრმავებას თხილის მოვლა-მოყვანის სრული ციკლისა და ახალი ტექნოლოგიების შესახებ.   ტრენინგებზე მსმენელებს საშუალება ჰქონდათ მიეღოთ ინფორმაცია და პრაქტიკული რჩევები თხილის ბაღების გაშენების, სხვლა-ფორმირების, მოსავლის აღებისა და პირველადი სასაქონლო დამუშავების, თხილის ბაღებში ჩასატარებელი ძირითადი აგროტექნიკური ღონისძიებების, თხილის ჯიშებისა და სარგავი მასალის წარმოების საკითხებში. თითოეული ტრენინგის ბოლოს, ფერმერებს შესაძლებლობა ჰქონდათ კითხვა-პასუხის რეჟიმში ცენტრის სპეციალისტებისგან ამომწურავი ინფორმაცია მიეღოთ არსებულ შეკითხვებზე. კვლევითი ცენტრის მიერ დაგეგმილი მსგავსი ტიპის ტრენინგები პერმანენტული ხასიათისაა და როგორც დასავლეთ, ისე აღმოსავლეთ საქართველოში განხორციელდება. აღნიშნული ტრენინგები სოფლის მეურნეობის სამინისტროს რეგიონალური სამმართველოებისა და საინფორმაციო-საკონსულტაციო სამსახურების ხელშეწყობით ხორციელდება.