ტრენინგზე კვლევითი ცენტრის სპეციალისტებმა მეფუტკრეობისა და მესაქონლეობის განვითარებისთვის საჭირო მნიშვნელოვან საკითხებზე პრეზენტაციები წარმოადგინეს, მსმენელებს  ინფორმაცია მიაწოდეს და  პრაქტიკული რჩევები გაუზიარეს ფუტკრის ოჯახის მოვლა-პატრონობის, დამატებითი კვების, მთაბარობის, ფუტკრის დაავადებების იდენტიფიცირების, მასთან ბრძოლის ეფექტური მეთოდების, თანამედროვე სამკურნალო-პროფილაქტიკური საშუალებებისა და თაფლის კვლევის ევროპული სტანდარტების შესახებ, რომელიც უკვე საქართველოში ხორციელდება. ფერმერები ასევე გაეცნენ ცხოველთა მოვლა-შენახვისა და კვების, მათი აღწარმოების, ხელოვნური განაყოფიერებისა და მის მნიშვნელობასთან დაკავშირებულ საკითხებს. ტრენინგის ბოლოს, მსმენელებს შესაძლებლობა ჰქონდათ კითხვა-პასუხის რეჟიმში ცენტრის სპეციალისტებისგან მიეღოთ სასურველი, დამატებითი ინფორმაცია.
კვლევითი ცენტრის მიერ დაგეგმილი მსგავსი ტიპის ტრენინგები პერმანენტული ხასიათისაა და პერიოდულად განხორციელდება ბაღდათის მუნიციპალიტეტში. აღნიშნული ტრენინგები ბაღდათის მუნიციპალიტეტის გამგეობის, სოფლის მეურნეობის სამინისტროს რეგიონალური სამმართველოებისა და ბაღდათის საინფორმაციო-საკონსულტაციო სამსახურის ხელშეწყობით ხორციელდება.