სიახლეები

სარგავი მასალის სერტიფიცირების პროცესი შეუფერხებლად მიმდინარეობს

გარემოს დაცვისა და სოფლის მეურნეობის სამინისტროს სოფლის მეურნეობის სამეცნიერო-კვლევითი ცენტრი სარგავი მასალის სერტიფიცირების პროცესს, მთელი საქართველოს მასშტაბით ახორციელებს. აჭარაში, ა(ა)იპ აგროსერვის ცენტრის სანერგე მეურნეობამ სერტიფიცირება 3 კულტურაზე - ვაშლი, მსხალი და ტყემალი მიიღო. სერტიფიკატების გადაცემის ღონისძიებას აჭარის სოფლის მეურნეობის მინისტრი გიორგი სურმანიძე, სამინისტროს და ამერიკის შეერთებული შტატების საერთაშორისო განვითარების სააგენტოს (USAID) წარმომადგენლები დაესწრნენ.

USAID-ის სოფლის მეურნეობის პროგრამა სახელმწიფოს საკანონმდებლო ბაზის ჰარმონიზაციასა და სპეციალისტების გადამზადებაში, ასევე, სანერგე მეურნეობებს შესაძლებლობების გაზრდასა და სერტიფიცირების სისტემის დანერგვაში ეხმარება. პროგრამა ფერმერების ფინანსურ მხარდაჭერასაც მოიცავს, რაც სანერგეებს, 2024 წლისთვის, სავალდებულო სერტიფიცირების პროცესზე გადასვლაში დაეხმარება. სოფლის მეურნეობის სამეცნიერო-კვლევით ცენტრთან ერთად, უკვე შემუშავებულია სანერგეში ჩასატარებელი სამუშაოების, სარგავი მასალის მოძრაობის და ფიტოსანიტარიული ჟურნალები, რომელიც მენერგეებს სერტიფიცირების პროცესში დაეხმარება.

საქართველოში სარგავი მასალის ნებაყოფლობითი სერტიფიცირების პროცესი 2017 წლიდან მიმდინარეობს. სათესლე და სარგავი მასალის სერტიფიცირების კარგად ორგანიზებული სისტემა უზრუნველყოფს მომხმარებელს ხარისხიანი მასალით, რაც მოსავლიანობის და საექსპორტო პოტენციალის გაზრდის, კონკურენტუნარიანობის ამაღლების და ინვესტიციების მოზიდვის მნიშვნელოვანი საფუძველია. საქართველოს ევროპასთან ასოცირების ხელშეკრულებით ნაკისრი ვალდებულებების შესრულების ფარგლებში, თესლი და სარგავი მასალა 2024 წელს სავალდებულო სერტიფიცირებას დაექვემდებარება.