სიახლეები

საქართველოში მეცხოველეობის მიმართულებით არსებულ მდგომარეობასა და პერსპექტივებზე იმსჯელეს USAID-ის, ამერიკული კომპანიის „ალტა ჯენეტიკსი“ და სოფლის მეურნეობის სამეცნიერო-კვლევითი ცენტრის წარმომადგენლებმა

სამუშაო შეხვედრაზე აღინიშნა, რომ მესაქონლეობის მიმართულებით განხორციელებული პროექტების ფარგლებში, დღეისათვის, აღდგენილია ქართული მთის ძროხა, მეგრული წითელი და კავკასიური წაბლა.

სოფლის მეურნეობის სამეცნიერო-კვლევითი ცენტრი აღდგენილ ადგილობრივი ჯიშების სანაშენე ცხოველებს დაინტერესებულ ფერმერულ მეურნეობებს, მათი შემდგომი სელექციის, გამრავლების, გაუმჯობესების და გავრცელების მიზნით გადასცემს.

„ალტა ჯენეტიკის“ წარმომადგენლებმა განსაკუთრებული ყურადღება სტაციონარული მეცხვარეობის განვითარებასა და საფრანგეთიდან შემოყვანილი ცხვრის ჯიშების ადაპტაციის საკითხებზე გაამახვილეს. ცენტრის სპეციალისტების მიერ შეირჩა საქართველოს რეგიონი, სადაც ცხვრის ახალი ჯიშების შეყვანა იქნება მიზანშეწონილი.

შეხვედრაზე, მეცხოველეობაში სანაშენე საქმიანობის განვითარებასა და მაღალპროდუქტიული ჯიშების ხელმისაწვდომობაზეც გამახვილდა ყურადღება. აღსანიშნავია, რომ 2022 წლიდან, სამეცნიერო-კვლევითი ცენტრი სასოფლო-სამეურნეო ცხოველთა ჯიშური მიკვლევადობის სისტემის ფორმირებას იწყებს.