სიახლეები

ჩეხეთის და საქართველოს სოფლის მეურნეობაში სამეცნიერო თანამშრომლობის გაღრმავების მიზნით, შეხვედრა გაიმართა

სოფლის მეურნეობის სამეცნიერო-კვლევითი ცენტრის დირექტორი, ლევან უჯმაჯურიძე ჩეხეთის ჰოლოვოუსის მეხილეობის სამეცნიერო-სელექციური ინსტიტუტის წარმომადგენლებს, წამყვან მეცნიერ-მკვლევარებს ბორის კრსკასა და ირი სედლაკს შემდგომი თანამშრომლობის, ერთობლივი კვლევითი პროექტების დაგეგმვისა და განხორციელების მიზნით შეხვდა. მხარეებმა კვლევითი ინსტიტუტების საქმიანობა, მიმდინარე პროექტები და მიზნები განიხილეს.

ჩეხეთის მეხილეობის სამეცნიერო-სელექციური ინსტიტუტი ძირითადად ხეხილის გენეტიკური რესურსების კონსერვაციისა და სელექციის მიმართულებით მუშაობს. ინსტიტუტის ბაზაზე თავმოყრილია ზომიერი კლიმატის სხვადასხვა ხეხილოვანი კულტურების ჯიშების ფართო მრავალფეროვნება, მსოფლიოში ერთ-ერთი უმდიდრესი ვაშლის საველე კოლექცია, რომელიც 1800-მდე ჯიშსა და ფორმას მოიცავს.

სტუმრებმა ჯიღაურას მრავალწლოვანი კულტურების საცდელ-სადემონსტრაციო ბაზაც მოინახულეს, სადაც მეხილეობის კუთხით - თესლოვანი, კურკოვანი, კაკლოვანი და კენკროვანი კულტურების საკოლექციო ნარგაობაში 180-ზე მეტი ადგილობრივი და 270-მდე ინტროდუცირებული ჯიშია დაცული. ჰოლოვოუსის ინსტიტუტის მკვლევარები ასევე ქართული ვაზის ჯიშების ამპელოგრაფიული და ინტროდუცირებული ჯიშების კოლექციას გაეცნენ.