სიახლეები
21.08.2024
სადეგუსტაციო კომისიამ ჯიღაურას ვენახის კოლექციის იშვიათი ვაზის ჯიშებიდან წარმოებული ღვინოები შეაფასა
![](/modules/news/images/0/454614686_475004465428535_4106459244628010163_n_(1).png)
დეგუსტაციას ცენტრის მევენახეობისა და მეღვინეობის კვლევის სამსახურის უფროსი დავით ჩიჩუა უძღვებოდა. სადეგუსტაციო კომისიის შემადგენლობაში სსიპ სოფლის მეურნეობის სამეცნიერო-კვლევითი ცენტრის დირექტორი ლევან უჯმაჯურიძე, ცენტრის მევენახე-მეღვინეები, სტუდენტები და მოწვეული მეღვინეობის ექსპერტები იყვნენ.
დეგუსტაციაზე წარდგენილი იყო ჯიღაურას ვენახის კოლექციაში დაცული ქართლის, კახეთისა და იმერეთის რეგიონის იშვიათი ვაზის ჯიშებიდან ამავე მიკროვინიფიკაციის ბაზაზე წარმოებული თეთრი და წითელი ღვინოების 70-მდე ნიმუში, რომელთა სენსორული და ორგანოლეპტიკური შეფასება 5-ბალიანი სისტემით განხორციელდა.
განსაკუთრებული მოწონება და კომისიის მაღალი შეფასება დაიმსახურა შემდეგმა ჯიშებმა: საფენა, ინგილოური, მწვანე კახური, ვაზისუბნის შავი, სიმონასეული (კახეთი); ჩიტისკვერცხა, ჯვარი, ქიშური, ატენის საფერე, ბუზა (ქართლი); კრახუნა, კაპისტონი, კუნძა, ადანასური, გაბეხაური, არგვეთული საფერე (იმერეთი).„სსიპ სოფლის მეურნეობის სამეცნიერო-კვლევითი ცენტრი აქტიურად მუშაობს ქართული ენდემური ვაზის ჯიშების მოძიება-აღდგენის, მათი ამპელოგრაფიული და ენოლოგიური მაჩვენებლების შესწავლის საკითხებზე. მეტად მნიშვნელოვანია მსგავსი სამუშაო დეგუსტაციების მოწყობა. იგი არამარტო ქართული იშვიათი ვაზის ჯიშების პოპულარიზაციას, არამედ ენოლოგიური პოტენციალის შეფასებით მათ წარმოებაში დაბრუნებას შეუწყობს ხელს“, - განაცხადა ექსპერტმა, ენოლოგმა ზურაბ სტურუამ.