სიახლეები

ქალი ფერმერები მუხურის მეფუტკრეობის საცდელ ბაზას სტუმრობდნენ

სსიპ სოფლის მეურნეობის სამეცნიერო-კვლევითი ცენტრის მუხურის მეფუტკრეობის საცდელ ბაზას აჭარის სოფლის მეურნეობის მინისტრის მოადგილე ირმა აფხაზავა, აგრარული განვითარების დეპარტამენტის წარმომადგენლები და რეგიონის ხუთი მუნიციპალიტეტიდან 20-მდე ფერმერი ქალი სტუმრობდა.

მუხურის ბაზაზე სტუმრებს უმასპინძლეს ცენტრის მეფუტკრეობის მიმართულების სპეციალისტმა ნანა მაისურაძემ და მორფოლოგიურ-ექსტერიერული კვლევის ლაბორატორიის თანამშრომელმა ლალი ჩიქოვანმა. შეხვედრის ფარგლებში მათ დეტალურად გააცნეს მეფუტკრეობის მიმართულებით მიმდინარე კვლევითი საქმიანობა, ქართული რუხი ფუტკრის პოპულაციის შენარჩუნების გზები, დაავადებების იდენტიფიცირების ლაბორატორიული შესაძლებლობები და თანამედროვე მეფუტკრეობის სპეციფიკა.

სტუმრებმა ადგილზე დაათვალიერეს საცდელი ნაკვეთები და ფუტკრის სკები, გაეცნენ სკების კონსტრუქციული თავისებურებებსა და ადგილობრივ პირობებზე მორგებულ მიდგომებს. განსაკუთრებული ყურადღება დაეთმო ლაბორატორიულ კვლევებს, მათ მნიშვნელობას ფუტკრის ჯანმრთელობისა და გენოფონდის შენარჩუნების პროცესში.

ვიზიტი ჩატარდა აჭარის სოფლის მეურნეობის სამინისტროს 2025 წლის ქვეპროგრამის „აგრარული ექსტენციის მიწოდება“ ფარგლებში, ღონისძიების ფარგლებში – „სოფლის მეურნეობის დარგში მომუშავე წარმატებული ქალებისათვის“. მიზანს ქალ ფერმერთა ცოდნის გაღრმავება, თანამედროვე აგროპრაქტიკების გაცნობა და სამეცნიერო-კვლევით ცენტრთან თანამშრომლობის გაძლიერება წარმოადგენდა.