ტრენინგის მიზანს ადგილობრივი სალუდე მიმართულების ქერის ბიომიმართულებით მოვლა-მოყვანის თავისებურებების გაცნობა, ბიოაგროწარმოების პრაქტიკების პოპულარიზაცია და იმ აგროტექნიკური მეთოდების წარდგენა წარმოადგენდა, რომლებიც ხელს უწყობს ქერის ჯიშების ეკოლოგიურად სუფთა გარემოში მოყვანას. ბიოაგროწარმოების კვლევის სამსახურის წარმომადგენელმა მზეინაბ სარალიძემ ტრენინგის მონაწილეებს დეტალურად მიაწოდა ინფორმაცია ქერის ბიომიმართულებით წარმოების თავისებურებების, ადგილობრივი ჯიშების აღდგენისა და შენარჩუნების მნიშვნელობის შესახებ, რაც აუცილებელი პირობაა  როგორც აგრობიომრავალფეროვნების შენარჩუნებისთვის, ისე ქართული ლუდის ხარისხიანი წარმოების ხელშეწყობისთვის. ტრენინგის პრაქტიკული სწავლება ჩატარდა ადგილობრივი ფერმერის მარიამ წიკლაურის ქერის საცდელი ნაკვეთზე.   ბიოაგროწარმოების კვლევის სამსახურის უფროსმა გოჩა წერეთელმა ისაუბრა ცენტრში ბიოწარმოებისათვის შერჩეულ ქერის ჯიშზე – „ზეს 5“ – ჩატარებული კვლევის შედეგებზე. მისი განცხადებით, გამოყენებული 12 ბიოპრეპარატიდან საუკეთესო ეფექტი გამოავლინა შპს „ბიოაგროს“ თხევადმა ბიოჰუმუსმა, ჯეოჰუმატმა და ბიოსუპერმა, რაც მარცვლის მოსავლიანობის ზრდაში აისახა. საცდელ ნაკვეთებში მოსავალი 0.06-1.15 ტონით აღემატებოდა საკონტროლო ვარიანტს.