სიახლეები

გერმანელი მეცნიერის ვიზიტი სოფლის მეურნეობის სამეცნიერო-კვლევით ცენტრში

სსიპ სოფლის მეურნეობის სამეცნიერო-კვლევითი ცენტრის ჯიღაურასა და წილკნის ბაზებს გაიზენჰაიმის მევენახეობა-მეღვინეობის სამეცნიერო-კვლევითი ინსტიტუტის მკვლევარი და ლექტორი ტიმო შტრაქი ესტუმრა.

ვიზიტის ფარგლებში, ცენტრის დირექტორმა, პროფესორმა ლევან უჯმაჯურიძემ სტუმარს გააცნო ცენტრის როლი და საქმიანობა, დაათვალიერებინა საცდელ-საკოლექციო ნაკვეთები, სამეცნიერო-კვლევითი ინფრასტრუქტურა და ვაზისა და ღვინის სამუზეუმო სივრცე.

გერმანელი მეცნიერი დეტალურად გაეცნო მევენახეობა-მეღვინეობის, მცენარეთა ეკოფიზიოლოგიისა და მიკროკლონური (in vitro) გამრავლების სამსახურების მიმდინარე კვლევებსა და სამუშაო პროცესს.

შეხვედრაზე, რომელსაც ცენტრის სამეცნიერო-კვლევითი სამსახურების ხელმძღვანელები და მეცნიერ-თანამშრომლები ესწრებოდნენ, განხილული იყო მევენახეობა-მეღვინეობის სფეროს თანამედროვე გამოწვევები: გენოფონდის დაცვა, კლიმატის ცვლილების გავლენა ვაზის კულტურაზე, დაავადებებისა და მავნებლების მართვა, ფილოქსერაგამძლე საძირეების შერჩევა, კლონური სელექცია და სხვა მნიშვნელოვანი საკითხები. ასევე ისაუბრეს საერთაშორისო სამეცნიერო თანამშრომლობის მნიშვნელობასა და სამომავლო პერსპექტივებზე, რაც ხელს უწყობს ცოდნისა და ინოვაციების გაზიარებას.

სოფლის მეურნეობის სამეცნიერო-კვლევითი ცენტრი დიდ მნიშვნელობას ანიჭებს მსგავსი ვიზიტების ორგანიზებას და მომავალშიც გააგრძელებს თანამშრომლობას საერთაშორისო ინსტიტუტებთან, მათ შორის გაიზენჰაიმის სამეცნიერო-კვლევით ინსტიტუტთან, რომელიც ცენტრის ერთ-ერთი უძველესი პარტნიორია მევენახეობა-მეღვინეობის მიმართულებით.