სიახლეები

ჩინეთის მკვლევართა ჯგუფის ვიზიტი ჯიღაურაში

​სსიპ სოფლის მეურნეობის სამეცნიერო-კვლევითი ცენტრისა და პეკინის აგრარული უნივერსიტეტის (ჩინეთი) თანამშრომლობის ფარგლებში, ცენტრის ჯიღაურის ექსპერიმენტულ ბაზას პეკინის აგრარული უნივერსიტეტის მკვლევართა ჯგუფი ეწვია. დელეგაციას ხელმძღვანელობდა პროფესორი, დოქტორი ჰუიქინ მა. სტუმრებს ჯიღაურაში  ცენტრის დირექტორი, პროფესორი ლევან უჯმაჯურიძე შეხვდა. ჩინელმა მეცნიერებმა სამეცნიერო-კვლევითი ცენტრის ჯიღაურას ბაზაზე განთავსებული ვაზისა და ხეხილოვანი კულტურების  ადგილობრივი და უცხოური ჯიშების საკოლექციო ნარგაობები, სამეცნიერო ლაბორატორიები, სამუზეუმო სივრცე მოინახულეს და მიიღეს ინფორმაცია ცენტრში მიმდინარე კვლევით პროექტებსა და სახელმწიფოს მხარდაჭერით განხორციელებულ პროგრამებზე. 
ვიზიტის ფარგლებში, მეცნიერებმა მონაწილეობა მიიღეს ერთობლივ სამეცნიერო ექსპედიციაში, რომლის მიზანს დასავლეთ საქართველოს ლეღვის (Ficus carica) ველური პოპულაციების ბიომრავალფეროვნების შესწავლა წარმოადგენდა. ექსპედიციაში ჩინელ მკვლევართან ერთად ცენტრის მეხილეობის კვლევის სამსახურის უფროსი, პროფესორი ზვიად ბობოქაშვილი მონაწილეობდა. აღნიშნული კვლევა მოიცავდა ნიმუშების GPS კოორდინატების დაფიქსირებას, ფენოტიპური და მორფოლოგიური ნიშნების შეფასებას, საანალიზო მასალების (კალმები, ფოთლები) შეგროვებასა და შემდგომში მათი მოლეკულური დნმ ანალიზის ჩატარებას.
პროექტის საწყის ეტაპზე იგეგმება ლეღვის ნიმუშების გენეტიკური და მორფოლოგიური მსგავსებების გამოვლენა და მათი შედარება მეზობელ რეგიონებში — სამხრეთ კავკასიასა და მცირე აზიაში — არსებულ მასალასთან. კვლევის ერთ-ერთი მნიშვნელოვანი მიმართულებაა ლეღვის კულტურის წარმოშობის ადგილის სავარაუდო გაფართოების ჰიპოთეზის შესწავლა, ასევე ადგილობრივი ქართული გენოტიპების აღმოჩენა, რომლებიც გამოირჩევიან შენახვისა და ტრანსპორტირების გაუმჯობესებული თვისებებით.
პროექტის მომდევნო ეტაპზე დაგეგმილია კვლევის გაფართოება საქართველოს სხვა რეგიონებში და მიღებული შედეგების საფუძველზე ლეღვის საკოლექციო ნარგაობის გაშენება.
აღსანიშნავია, რომ სოფლის მეურნეობის სამეცნიერო-კვლევით ცენტრსა და პეკინის აგრარულ უნივერსიტეტს მრავალწლიანი თანამშრომლობა აკავშირებს, რაც მოიცავს ქართველი ახალგაზრდა მეცნიერების ჩინეთში სასწავლო ტრენინგებზე გაგზავნას, ასევე ვაზის ჯიშების მოლეკულურ-გენეტიკური მახასიათებლების ფართომასშტაბიან კვლევას მსოფლიოს წამყვან ინსტიტუციებთან ერთად.