სიახლეები

სოფლის მეურნეობის სამეცნიერო-კვლევითი ცენტრის წარმომადგენლებმა ჩინეთში გამართულ აგრარული ტექნოლოგიების სატრენინგო პროგრამაში მიიღეს მონაწილეობა

სსიპ სოფლის მეურნეობის სამეცნიერო-კვლევითი ცენტრის წარმომადგენლები მევენახეობა-მეღვინეობის კვლევის სამსახურის უფროსი სპეციალისტი ნიკოლოზ კირვალიძე და ჩაისა და სუბტროპიკული კულტურების კვლევის სამსახურის სპეციალისტი ნიკა გუნთაძე, 2025 წლის 2–20 ნოემბერს მონაწილეობდნენ აგრარული ტექნოლოგიების საერთაშორისო სატრენინგო პროგრამაში, რომელიც ჩინეთის სახალხო რესპუბლიკაში, ჰუბეის პროვინციის დედაქალაქ უჰანში, ასევე ბეიჯინგსა და იანტაიში გაიმართა. პროგრამა ორგანიზებული და დაფინანსებული იყო ჩინეთის სოფლის მეურნეობის სამინისტროს, კომერციის სამინისტროს, ჩინეთის საელჩოსა და Hubei Vocational College of Bio-Technology-ის მიერ.

მივლინების ძირითად მიზანს წარმოადგენდა საქართველოსა და ჩინეთს შორის თანამშრომლობის გაძლიერება, აგრარული სექტორის თანამედროვე ტექნოლოგიებისა და ინოვაციური მიდგომების გაცნობა, პრაქტიკული გამოცდილების გაზიარება და დარგის განვითარების ხელშეწყობა. პროგრამა მოიცავდა როგორც თეორიულ სწავლებას, ისე პრაქტიკულ სამუშაოებს და შეეხო აგრარული მიმართულებების ფართო სპექტრს ტექნოლოგიური განვითარების ტენდენციებს, ორგანულ მიწათმოქმედებას, ზუსტ და რობოტიზებულ სოფლის მეურნეობას, ჰიდროპონიკას, ღვინისა და ალკოჰოლური სასმელების წარმოების ტექნოლოგიებს, კრიოპრეზერვაციასა და მექანიზაციის თანამედროვე მიდგომებს.

ტრენინგის ფარგლებში მონაწილეებს შესაძლებლობა ჰქონდათ დაეთვალიერებინათ კვლევითი ლაბორატორიები, სასათბურე და სასაქონლო მეურნეობები, მონიტორინგისა და შეფასების ინფრასტრუქტურა და პირადად გაცნობოდნენ ჩინეთის აგრარულ სექტორში დანერგილ თანამედროვე პრაქტიკებს.

ნიკოლოზ კრივალიძემ და ნიკა გუნთაძემ ჩინურ მხარეს წარუდგინეს პრეზენტაციები საქართველოს სოფლის მეურნეობის სისტემის, სამეცნიერო-კვლევითი ცენტრის საქმიანობისა და მიმდინარე კვლევითი მიმართულებების შესახებ. განსაკუთრებული ყურადღება დაეთმო ქართული მევენახეობა-მეღვინეობის კულტურულ და ტექნოლოგიურ მნიშვნელობას, ქვევრის ღვინის უნიკალურ ტექნოლოგიასა და ქვეყნის აბორიგენული ჯიშების მრავალფეროვნებას. ქართული იშვიათი ჯიშების დეგუსტაციამ მნიშვნელოვანი ინტერესი გამოიწვია და ხელი შეუწყო ორ ქვეყანას შორის პროფესიული და კულტურული თანამშრომლობის გაღრმავებას.

სატრენინგო პროგრამაში საქართველოს სოფლის მეურნეობის სამინისტროს დაქვემდებარებული უწყებების 14-კაციანი დელეგაცია მონაწილეობდა.

სოფლის მეურნეობის სამეცნიერო-კვლევითი ცენტრი მომავალშიც გააგრძელებს საერთაშორისო პარტნიორობის გაძლიერებასა და თანამედროვე ტექნოლოგიების პრაქტიკაში დანერგვას, რაც უზრუნველყოფს ქართული სოფლის მეურნეობის განვითარებასა და კვლევითი პოტენციალის ზრდას.