სიახლეები

აგროსატყეო კულტურების კვლევის სამსახურის წარმომადგენელმა, ნატალია ტოგონიძემ, მონაწილეობა მიიღო ქ. პარიზში გამართულ საერთაშორისო კონფერენციაში „სოფლის მეურნეობის, მეტყევეობისა და მებაღეობის მსოფლიო კონფერენცია – AFHWC 2025“.

კონფერენციაზე ნატალია ტოგონიძემ წარადგინა მოხსენება „სუბალპური არყნარი ტყის სუქცესიური სტადიების პოტენციალის განსაზღვრა ცენტრალურ კავკასიონზე“, რომელიც მომზადებულია ახალგაზრდა მეცნიერის კვლევითი პროექტის „სუბალპური არყნარი ტყის ბუნებრივი აღდგენის პროგნოზირებადი მოდელის შექმნა“ ფარგლებში.

მოხსენებაში განხილული იყო ცენტრალური კავკასიონის სუბალპური არყნარი ეკოსისტემების დინამიკა და მათი განვითარების ტენდენციები 2010–2025 წლებში. წარმოდგენილი იქნა კვლევის შედეგები სტეფანწმინდის მუნიციპალიტეტში, სადაც შეფასებულია არყნარი ტყეების ბუნებრივი რეგენერაციის პროცესები, სუქცესიური სტადიების ცვლილება და ეკოლოგიური ფაქტორების გავლენა აღდგენის ტემპებსა და მიმართულებებზე.

ამ ტიპის საერთაშორისო ღონისძიებებში ცენტრის ჩართულობა ხელს უწყობს თანამედროვე სამეცნიერო მიდგომების გაზიარებას, პარტნიორული ურთიერთობების გაფართოებას და მომავალი თანამშრომლობის ახალი მიმართულებების დაგეგმვას, რაც განსაკუთრებით მნიშვნელოვანია როგორც ინდივიდუალური მკვლევრებისთვის, ისე ქვეყნის სამეცნიერო სივრცისთვის.