ბორლაუგის სასტიპენდიო პროგრამა აშშ-ს მთავრობის მიერ ფინანსდება, რომელიც განვითარებადი ქვეყნების მაგისტრებსა და დოქტორანტებს აშშ-ს სხვადასხვა უნივერსიტეტებში სოფლის მეურნეობის კუთხით ცოდნის გაღრმავებასა და პრაქტიკული უნარ-ჩვევების გაუმჯობესებას სთავაზობს. აღნიშნული პროგრამა 2004 წლიდან ხორციელდება და უკვე 700 კურსდამთავრებული ჰყავს, მათ შორის საქართველოდანაც. საწრთვნელი პროგრამა 6-დან 12 კვირამდე პერიოდს მოიცავს და ორიენტირებულია ისეთ საკვლევ მიმართულებებზე, როგორებიცაა: აგრონომია, ვეტერინარია, სურსათის უვნებლობა, ფიტოსანიტარია, ბუნებრივი რესურსების მენეჯმენტი, სოფლის მეურნეობის ეკონომიკა და პოლიტიკა, კლიმატის ცვლილებები და სხვ. 

სოფლის მეურნეობის სამეცნიერო-კვლევითი ცენტრის წარმომადგენლებმა დიდი ინტერესი გამოთქვეს ბორლაუგის სასტიპენდიო პროგრამაში კვლევითი ცენტრის თანამშრომლების ჩართვასთან დაკავშირებით და აღნიშნეს, რომ ამ ინიციატივის ფარგლებში კვლევითი ცენტრი უახლოეს პერიოდში დაიწყებს პრიორიტეტული სამეცნიერო-კვლევითი თემების შემუშავებასა და მასში ცენტრის ახალგაზრდა მეცნიერების მონაწილეობის შესაძლებლობების შესწავლას. 

საერთაშორისო თანამშრომლობის გაღრმავების მიზნით, USDA-ის მიერ შემოთავაზებულ საგანმანათლებლო პროგრამაში ჩართვა განსაკუთრებით ეფექტიანი იქნება სოფლის მეურნეობის სამეცნიერო-კვლევითი ცენტრის იმ თანამშრომლებისთვის, რომლებსაც მიღებული აქვთ განათლება და უნარ-ჩვევები საქართველოს უნივერსიტეტებში, რის საფუძველზეც ტრენინგებს გაივლიან აშშ-ში და თავიანთი ცოდნითა და პრაქტიკული გამოცდილებით შეძლებენ საკუთარი წვლილი შეიტანონ საქართველოს სოფლის მეურნეობის სექტორის განვითარებაში მეცნიერულ საფუძველზე.